عايزة أراءكم لو سمحتم

[بسم الله الرحمن الرحيم

أحب اقولكم كل رمضان وأنتو طيبين وإن شاء الله يخلص رمضان وإحنا مغفور لينا برحمة ربنا علينا إن شاء الله

ثاني حاجة عايزة اشوف رأيكم فى موضوعي ، مش هسميه مشكلة لانه مش كبير أوي بس انا نفسي أحله بشكل راضي لكل الأطراف

أنا متجوزة بقالي 3 شهور والحمد لله وبقالي فترة بفكر أني أشتغل لأني عندي وقت فراغ كتيييير خصوصًا أن لسه مش حصل حمل ، لكن جوزي مش موافق ، وهو مكنش موافق من أيام الخطوبة وكان بيقولي الموضوع مقفول ، بس كانت أختي بتقولي ساعات الرجالة بتتغير شوية فى الموضوع دة وبتوافق بعد كدة ، على اعتبار أنهم ايام الخطوبة بيكونوا غيرانيين أكثر على خطيبتهم وكدة لكن بعد الجوزار ممكن يرضى على اعتبار كمان لو عندها وقت فراغ ،،

وكان سببه في الرفض هو أنه مش بيحب مراته تشتغل وكمان علشان الأختلاط والرجالة لو معايا في الشغل ، وعارفه ان رأيه صح ،،، بس الحمد لله أنا ممن يقال عنهم أنهم يبان عليهم السمت الديني حتى في ملابسي فأنا الحمد لله منتقبة ،،، وبدأت قترح عليه الموضوع دلوقتي تاني علشان يوافق بس هو مش راضي بارضو وبقى يقولى المبدأ مرفوض ،،، حاولت افهمه انى مش هروخ أي مكان وخلاص كمان اختى مدرسة وبيتقولى لو كدة ممكن اشوفلك حاجة عندها فى المدرسة إدارية يعنى وبتقول ان المدرسة عندها معظمها ستات اكتر من 90 % منها ،،، وفهمته كدة بس مش راضي بارضو ،، وبيقولي ان شغلي بيقلل منه ،، وفهمته ان مش فكرة فلوس خاالص والحمد لله هو مكفي بيته بس هو مش موافق وبفهمه ان انا عايزة اشتغل عشان نفسي اشتغل ولو تعبت او لاقيت هقصر على البيت هسيبه ،،، كمان انا بسهر للفجر وبنام لحد الساعه 2 او 3 وقليل لما بصحى بدري عن كدة وبفضل طول اليوم لوحدى وبخلص طبعا شغل البيت علطول وبراااااحة أوي ومش بنزل إلا ايام ما بروح لمامتي وحماتي ،،،، قلتله دة كله وهو بارضو مش مقتنع وقالي طب سبيني يومين افكر،،، بدأت احس ان هيكون في أمل انه يوافق بس خفت يروح يسأل حد مثلا من اصحابه بالذات واحد عزيز عليه انا اعرفه ويبقى متجوز واحدة زميلتي ،، بس قلت ربنا يسهل وميكونش يسأل حد ويقرر هو برأيه وبناءً على ردودي ليه عن اسباب رفضه للشغل ،،، لاقيته بارضو رافض بعد ما سألته تاني وقالي طيب ما تستني لحد بعد رمضان هو انتى هتشتغلي في رمضان ، قلت يمكن هيوافق اهو ،، قلتله انا هقدم في مدرسة خاصة او اتنين او ثلاثه وهما على ما يتصلوا بيأخدوا وقت إن كانوا عايزين مش معقول هقدم فى يوم هلاقيهم تاني يوم بيقولوا تعالى وحتى لو هنزل شغل علطول هيبقى ساعتين كدة وخلاص واروح لان الدراسة مش بدأ لسه ، لاقيته بارضو مش مقتنع وقال بارضو لا لان انتى كل ما بتفتحي الموضوع أنا بضايق والفكرة عندي مقفوله ....

فأنا اللى مضايقني انه مش موافق ونفسي اشتغل ،،، وبصراحة نفسي احوش فلوس من فلوسى أنا نفسي فى حاجات اعملها واتمنى تكون من مالي أنا ومطلبهاش منه .. مش علشان هو هيقولى لأ بس انا مش عايزة اتقل عليه هو الحمد لله مكفى البيت بس عليه جمعيات لسه فاضلها كام شهر لحد ما تخلص وهو ادها الحمد لله وبيحاول ميقصرش ... وقلت يمكن هو فاكرنى هنزل الشغل علشان كدة لما قالي ان فيها اهانة ليا وبالذات فى الوقت دة ،، بس انا قلتله ان انا مش نتازلو علشان الفلوس ،، وقالى حتى لو كنتى هتخلى الفلوس كلها ليكى او تطلعيها كلها لله انا مش موافق ،،،، وفهمته ان ماليش دعوة بحد ماليش دعوة بالناس هتقول نزلت شغل ليه ، هو أنت مش بتشغل ولا انا سبتك انت فى البيت وقلتلكم هنزل اشتغل بدالك ،،، بحاول افهمه ان نفسي بجد بس مش عارفه اخليه يوافق ازاى ...

انا نفسي افتح مثلا زى مركز كدة للكمبيوتر كتابة اوتصميم وتصوير بس دة محتاج فلوس ،، وفكرت فى الموضوع لانى بحب المجال دة وفى نفس الوقت بسبب رفضه للشغل من ايام الخطوبة ،،، فنفسى اشتغل واحوش وافتحه ... ومش عايزة اطلب منه كدة او اعرفه علشان ميحسش انه مش عارف يعملى حاجة انا عايزاها لان الموضوع محتاج على الاقل 5 الاف جنية ...

يا ريت تفيدوني رأيكوا اعمل ايه اخليه يوافق ...

وشكرا ليكوا ورمضان كريم center]

وعليكم السلام ورحمة الله وبركاته

اشكرك على رأيك وردك على موضوعي واهتمامك

بس عايزة اقول حاجة ان فكرة المشاكل اللى بتيجى من الشغل اكيد اه اعرفها واسمع عنها وبشوفها من ناس حواليا بس بتكون معظمها من اختلاط مع الرجل فى الشغل وبين السيدات وبيبان دة جدا للزوج واكيد بيضايق / الحاجة التانية هى مصروف البيت ان فى زوجات بترفض مثلا تشارك فى المصروف والزوج بيكون عايز انها تشارك فمن هنا بتحصل مشاكل / او انها بتهمل فى بيتها ومش مراعية جوزها واولادها لو عندها اولاد

لكن انا وضحت انى لو حسيت ان دة هيأثر هسيبه او تعبت منه بسبب الشغل نفسه او ان حصل حمل ولاقيت دة هيكون بالسلب عليا

وانا اكيد عايزة جوزى يوافق لان مش هينفع اشتغل غصب عنه وعلشان كدة عايزة اعرف ازاى اقدر اقنعه

كمان فكرة انى احوش من مصروف البيت دى مش ينفع خااالص لان من الديم ان لما اعمل كدة لازم الزوج يكون عارف بالحاجة دى ... فأولى انى احوش علشان حاجة خاصة بالبيت أو لزوجى او لشغله او لبقية الجمعيات مثلا اللى فاضلة ... وممكن يكون جوزى عايز يعمل حاجة معينة ويحوش مثلا علشان يعملها ... فأجى انا اقوله هحوش علشان عايزة كذا ... يأما هيوقف اللى كان عايزة علشانى او هيقولى لأ ان هو محتاج للفلوس اكتر

انا اللى مخلينى شايفة انه هيكون حاجة كويسة ليا بخلاف الفلوس طبعا هو انى بسهر جامد وبصحى متأخر زى ما قلت يعنى كدة صحيا غلط جداااااا وبقوم طبعا تعبانة ومكسلة وجسمى تاعبنى فبدل كدة شايفة انى استفيد بالوقت دة صحيا هصحى بدرى وكمان هعمل حاجة نفسى فيها وكمان هيجيلى منها دخل حتى لو قليل

~

بصى ياقمر انتى تعرفى منه اسباب رفضه وتمسكى سبب سبب وتناقشيه فيه ومتدخليش على السبب التانى الا لما تقنعيه بحل مشاكل السبب الاول وهكذا

تسلمى يا هند وعندك حق وانا فعلا عملت كدة زى ما وضحت اسباب رفضه وردودي عليها بس يالا خير ان شاء الله

مصروفي الشخصي اللى هو مصروف البيت اكيد لازم بارضو اعرفه ان هو لاحتياجات البيت وان انا هدخر منه ليا ... لانى عرفت كدة من الدين كمان ماما معرفانى كدة

ايوة كدة فهمت قصدك ايه بس دة للأسف مش كل الأزواج يعرفوه او بيعملوه او مثلا فى زوجات بيتفقوا عليه مع الزوج مسبقا او فى بداية زواجهم ... بس دة محصلش معايا حتى مامتى قالتلى حاولى متخليش مصروف البيت فى ايدك وانتى المتحكمة فيه علشان الزوج بيشي ايده خااالص وبيسيب كله على الزوجة ودة بيعمل وجع دماغ وتعب ومشاكل ... فخلى الفلوس معاه ولما تيجى تجيبى حاجة خدى منه علشان هو يبقى فاهم وعارف ايه هى المصاريف ومقدر انها مش قليلة او حجمها ازاى ... وقالتلى على فكرة انى اقوله على مصروف ليا انا ... بس انا مش بقيت عارفه اقولها ليه ازاى وكمان قلت لماما ولنفسي ان كدة كدة الفلوس موجودة ولو قلتله هجيب حاجة او هتشترى حاجة مش هيقول لأ واتحرجت بصراحة اطلب منه كدة .... ومش عارفه دى كانت غلطة منى ولا ايه ... لأن فى بداية جوازنا طبعا يعتبر مفيش مصاريف بتتصرف إلا قليلة جدا لأن مسلتزمات البيت موجودة يعتبر فمش اتفقنا على مثلا نظام معين انه يدينى المصروف كله او يدهولى بالاسبوع ولا حاجة ... هو قالى مثلا الفلوس اهى بناخد منها احنا الاتنين وبنصرف او بيدينى غيرها لو خلصت وهكذا ....
وكمان زى ما قلت ان الوقت الحاضر هو بيدفع جمعيات ومش ينفع اقوله على مصروف ليا شخصي ...

الحاجة اللى خلتني اصمم اكتر على الشغل موقف حصل ادامه من مامته وحسستني انى مش عاجباها من البداية من ساعة ما أتقدم وكأنها اتدبست فيها وقالت كلام ضايقني وبقت تشكر اوي في واحدة بيفكروا يخطبوها لأخوه وراحت قايله بعدها الكام كلمة عليا انا ... بس انا قلت كويس ان الكلام كان ادامه ... ودة خلاني عايزة اشتغل اكتر واحس اني بعمل حاجة علشان هي متقللش منى تاني ... رغم اني مش وحشة ولا مش متعلمة بل بالعكس انا شكلي معقول زى البنات العادية وتعليمي كويس جدا لاني اتخرجت في كاية من كليات القمة وايام الخطوبة كانوا بيشكروا فيا جدا للناس ولقرايبهم وعلى نسبهم لعيلتنا ... بس كلامها دة حسسني ان دلوقتي بقيت عندها ولا حاجة ...

المشكلة انى بحاول اتجاهل اللى بتقوله واكبر دماغي بس كل مدى بتزيد فى كلامها . وشوية كلمة منها على كملة من حمايا على كلمة من حد تاني بضايق ... وانا من النوع الحساس اللى بزعل وبضايق لما بحس انى بتهان او حد بيغلط فيا .. بتصعب عليا نفسي اوى
وهى عايزانى اروح عندها لو كل يوم يكون يا ريت وكنت بحاول اتهرب من كدة لانى مش حابة دة من قبل رمضان وساعات كان 3 ايام فى الاسبوع او يومين او يوم وطبعا المرة اللى يكون روحت فيها يوم فى الاسبوع كنت بروح المرة اللى بعدها يتقالى كلمتين بس كنت بيتهيلى انى كدة بحاول انفذ اللى انا عايزاه ان يوم عندها ويوم عند امى .... بس لاقيت بدأت انتظم على يومين فى الاسبوع لان جوزى عايز كدة وهى كمان بقت تتصل وتقول تعالوا فى اليومين اللى هو حددهم ... وانا فهمته انى مش هقضيى الاسبوع كله عند امى وعند حماتي لانى محبش كدة من زمان واحب يكون ليا استقلالي ببيتى واقعد فيه .... بس حبيت بقى انفذ دة على رمضان على اعتبار الصيام او انى مش هقدر اروح او كدة لكن روحت اول يوم عندهم وتانى يوم عند ماما وثالث يوم فى بيتى ولاقيتهم فى رابع يوم بيتصول علشان نروح وبيسألوا مجيناش ليه فى تالت يوم ... وحمايا بيقولى مجيتوش ليه مدام مكنتوش عند اهلك عشان نفطر علطول عندهم او عند اهلى ... بس انا مش حبة كدة وكمان انا اللى بروح طبعا اشيل كل حاجة خاصة بالأكل فبرجع تعبانة بصراحة ...

الكلمة اللى قالتها ليا كانت فى اول يوم رمضان بعد الفطار وهى بتحي عن البنت اللى راحت تشوفها وتبارك ليها على نجاحها فى الثانوية وان فى كلام عليها لاخو جوزى وفضلت تحكى عليها وتقول كويسة وعسولة وتقعد كدة تتكلم وتحكى مش زى ناس قرايبنا بتتكسف .. حتى جوزى اخد باله وبيقوله انتى قصدك على مراتي .. وكملت كلامها وبتقول وامورة ومفيهاش حاجة تتعيب .. فرد جوزى بيهزر وبيضحك بيقولها قصدك ايه يعنى .. قالتله ايوة هو انا كنت شوفت مراتك الا لما اتفقنا هو انا كنت اعرفها اصلا ودخلت اشوفها مكنتش عارفه هى دى العروسة ولا اختها .. مش انت روحت شوفتها وقالولك تعالى لوحدك من غير حد ... خلصت هى الكلام وسبتهم وقمت روحت المطبخ

انا وجودى هناك بحس انه لاجل منفعتهم وبس ممكن اكون غلطانة فى تفكيرى دة بس للأسف دة اللى بحسه منهم ومن تصرفاتهم وكلامهم معايا

ربنا يهديهوللك يارب ويعمللك كل الي نفسك فيه

تسلمى يا ياسمين ان شاء الله

الحمد لله . وان شاء الله خير
بس بجد نفسي أشتغل اوي نفسي أحس اني اشتغلت وجبت فلوس من شغلي انا مش مصروف بابا بيدهولي او فلوس زوجس ونفسي اعمل حاجات بارضو من فلوسي أنا .. نفسي أجرب الشغل حتى لو زى ما بيتقال انه متعب بس اجربه ولما ازهق منه هسيبه عن تجربه بس للأسف هو مش موافق بارضو وبرد عليه فى كل سبب بارضو بيقولى المبدأ مرفوض .. افهمه انه مكان كويس ومفيش اختلاط ولو لاقيت تعب او تأثير على البيت هسيبه وأنى هشتغل عشان انا نفسي فى كدة مش علشان فلوس للبيت ...

بجد بقيت بزعل اوى واحس ان نفس الاحساس بيتكرر لما كنت بيبقى نفسي فى حاجة واقول عليها لبابا وميوافقش عليها زى الشغل دى وكان بيقولى ان السبب الخوف عليا رغم ان جالى شغل مكنتش هلاقى اقرب منه فى نفس المدينة اللى عايشة فيها ... كنت بحس انه رفض لسبب الرفض وخلاص وكنت بزعل اوى .. فبقيت احس نفس الاحساس

لانى بجد نفسي وبدعي ربنا انه يوافق بس هو بارضو مش موافق .. مش عارفه اعمل معاه ايه تانى

السلام عليكم ورحمة الله وبركاتو وكل عام وانتى بخير
انتى ممكن تقوليلو انا عندى وقت فراغ كتير ومش عرفة استفيد منو وببأ زهئانا فى البيت وانا لوحدىوالشغل ممكن يخيب عن مملى لانى بجد زهئانا ومش لاقيا حاجة تسعدنى